آسائش پسند طالب علم کبھی بھی علم حاصل نہیں کرسکتا

شاہدالدین                                                                                                                                                               

                                                                                                   درجہ تکمیل                                                                                                                             

آسائش پسند طالب علم کبھی بھی علم حاصل نہیں کرسکتا

            دورِ طالب علمی کاوش اور محنت کا دور ہوتا ہے اس میں کوئی شک نہیں کہ یہ انسان کی زندگی کا سنہراوقت ہوتا ہے جو طالب علم اس حقیقت کو بہ وقت جان لیتا ہے وہ آئندہ زندگی میں نہ صرف کامیابی حاصل کرتا ہے بلکہ اپنے والدین اور عزیز واقارب کیلئے بھی عزت وافتخار کا باعث بنتا ہے ،بالعموم طالب علم کو وہ مواقع مہیا کئے جاتے ہیں جن کے ذریعے وہ اپنے وقت اور صلاحیتوں کا بہترین استعمال کرسکے۔لہذا اسے چاہئے کہ اپنا زیادہ سے زیادہ وقت اپنے روابط اور تجربات کے ذریعے چیزوں کو سمجھنے اور جاننے میں صرف کرے۔جتنی جلدی طالب علم کو وقت کی اہمیت کا احساس ہوگا اور جتنا بروقت وہ اپنے محنت کا بہترین کا استعمال کرنا شروع کردے گا اتنا ہی عملی زندگی میں طالب علم کا مستقبل روشن اور کامیاب ہوگا۔

            دورقدیم ہی سے طالب علمانہ زندگی کے کچھ نقائص بیان کئے جاتے ہیں بالعموم چند ایک چیزوں میں غرور طلبِ علم کی راہ میں سب سے بڑی رکاوٹ قراردیا جاسکتا ہے۔سستی اور کاہلی ،غرور اورتکبر ،بے سکونی اور بے قراری ،بری صحبت ،عدم تجسس اورعدم دلچسپی ،ضروریات سے زیادہ اثر قبول کرنا، ریاکاری اور نمود ونمائش …العرض ایک آسائش پسند انسان کبھی علم حاصل نہیں کرسکتا ۔اسی طرح ایک حقیقی طالب علم فراغت اور آرام کا متحمل نہیں ہوسکتا جیسے کہ امام محمد کا قول ہے ''لایحصل العلم براحة الابدان''یعنی کہ علم بدن کو راحت دینے سے حاصل نہیں ہوتا۔طالب علم کی مثال سپاہی کی طرح ہے جو مستقبل کی جنگ کیلئے خود کو تیار کرتا ہے اس مقصد کے لئے سخت ترین مشقیں کرکے تکلیفوں کو برداشت کرکی تربیت حاصل کرنا پڑتی ہے۔اسی طرح ایک خاص عرصے کے دوران جو مشق اور تربیت حاصل کرتا ہے وہ بعد ازاں عملی زندگی میں درپیش آنے والے مصائب ومشکلات میں بھی اس کے کام آتی ہے۔

            اگر ایک طالب علم خود کو ہمہ وقت حصول علم کے مقدس فریضے کی تکمیل میں مصروف رہتا ہے اور وہ اپنی ترجیجات کا درست تعین کرلیتا ہے تو یقینا وہ ہر مرحلے پر درست فیصلہ کرسکے گا اسے علم ہونا چاہئے کہ کون سی چیز اور کون ساکام اس کیلئے غیراہم ہے ،یوں وہ اپنے روزمرہ امور کیلئے بھی ایک منضبط نظام العمل تشکیل دے گا اور ان تمام خرابیوں سے محفوظ رہے گا جو غیر ذمہ دار اور لاپرواہ طالب علموں میں درپیش آتی ہیں۔دوسرا یہ کہ اگر ایک طالب علم میں جاننے کی خواہش زندہ ہے تو اس میں کبھی غرور اورتکبر پیدا نہیں ہوسکتا کیونکہ اگر کسی طالب علم میں یہ خراب خصلت پیداہوجائے تو اسے بے تحاشا نقصان پہنچتا ہے کیونکہ ایسا طالب علم دوسروں سے کچھ سیکھنے کو کسرِ شان سمجھے گا ،ایک متکبر طالب علم ،علم کی قدر نہیں کرتا کیونکہ اپنے متکبرانہ روئیے کے سبب وہ اس تھوڑے علم سے بھی کوئی فائدہ نہیں اُٹھا پاتا ہے جو اسکے پاس واقعی نامکمل علم بعض اوقات لاعلمی سے بھی زیادہ خطرناک ثابت ہوتا ہے۔